МЭДЛЭГ БОЛ ХҮЧ

   

Бүгд Найрамдах Хятад Ард Улс нь газар нутгаараа Зүүн Азийн хамгийн том, дэлхийн гурав эсвэл дөрөвт жагсдаг орон юм. Хүн ам нь 1.3 тэрбум гаруй бөгөөд дэлхийд тэргүүлдэг.
БНХАУ байгуулагдсанаас хойш Хятадын хүн ам хурдацтайгаар өссөний улмаас Засгийн газраас 1979 онд Нэг хүүхдийн бодлого хэрэгжүүлж, төрөлтийг хязгаарлах болсон. Үүний үр дүнд төрөлтийг хязгаарлаж, хүн амын өсөлтийг бууруулж чадсан боловч иргэншилгүй хүүхдүүд болон хүүхдийн наймаа газар авсан ажээ.

Албан ёсны тоо баримтаас үзэхэд уг бодлогоор 400 сая төрөлтийг хязгаарлажээ. Өөрөөр хэлбэл энэхүү бодлого хэрэгжээгүй бол хятадын хүн ам ойролцоогоор 400 саяар нэмэгдэх байсан. Зарим шүүмжлэгчид Хятадыг энэхүү бодлогоо зарим талаар зөөлрүүлэхийг шаарддаг, учир нь энэ нь хүн амын бүтцийг гажуудуулсан.  

Хятадад хэрэгждэг энэхүү хатуу бодлогоор ихэнх гэр бүлүүд нэг хүүхэдтэй байх ёстой. Өв залгамжлах хүүтэй болохын тулд зарим гэр бүлүүд төрөөгүй охин хүүхдээ үр хөндүүлж эсвэл нялх эмэгтэй хүүхдээсээ татгалздаг ажээ. Мянга мянган нялх охидыг гадныхан үрчилж авдаг байна.

Энэ нь нэг талаасаа хүүхдийн эрх зөрчигдөж байгаа юм. Хайрт эхийнхээ хэвлийд бий болсон хүүхдийг эмэгтэй гэдгийг мэдээд үр хөндүүлж байна гэдэг мөн нэгээс илүү хүүхэдтэй байж болохгүй гэж заасан нь хүүхдийн эрхийг хамгийн томоор зөрчиж байгаа юм. Энэ талаар хүүхдийн төлөө ажилдаг олон улсын байгууллага болон тухайн улсын хүмүүс өөрсдөө юу гэж бодож явдаг нь хамгийн хачирхалтай.

"Нэг гэр бүл- нэг хүүхэд" нэртэй Хятадын төрийн бодлого жилдээ 13 сая хүүхдийн амийг хөнөөдөг.

Хэдийгээр эдийн засаг нь эрчимтэй өсч байгаа ч урьдын адил хосууд нэгээс илүү хүүхэдтэй болохгүй гэсэн хэвээрээ. 

Хятад хуулийн энэ заалтыг цуцлах тухай яриа сүүлийн үед багагүй гарах болсон ч одоогоор албан ёсоор цуцалсан зүйл алга. Энэ хууль нь хүний эрхийг зөрчиж байгааг олон улс байн байн сануулсаар сүүлдээ залхжээ.

Саяхан "Al Jazeera" телевизийн сурвалжлагч Шямень хотод оршин суугч Сяо Айнг хэмээх бүсгүйг хоёр дахь хүүхдээ гаргах гэхэд нь нутгийн иргэд зүй бусаар харьцаж, үрийг нь зулбуулсан хэрэг гарсныг мэдээлжээ. Сяо 10 настай охинтой бөгөөд дахин хүүхэдтэй болохыг хүссэн бөгөөд найман сартай жирэмсэн байсан аж. 

Өнгөрсөн аравдугаар сарын 10-нд нутгийн удирдах албаны хүмүүс, эмнэлгийн машины хамт Сяогийн гэрт гэнэт ирж, түүнийг хууль зөрчихийг санаархсан хэргээр зэмлэж, автомашин руу түлхэн суулгаж, эмнэлэгт аваачжээ. Гурав хоног эмнэлэгт байлгах хугацаанд Сяогийн үр зулбаж, хүүхэдтэй болох хүсэлдээ цэг тавьжээ. 

"Нэг гэр бүл-нэг хүүхэд" гэсэн бодлогыг хэрэгжүүлэх гол механизм болсон хуулийг хэрвээ зөрчвөл 40 мянга хүртэл ам.доллараар торгох, ажлаас нь халах, өмч хөрөнгийг хураах зэрэг шийтгэл ногдуулдаг байна.

Албан ёсоор жилд 13 сая аборт хийдэг тухай мэдээллийг China Daily цацсан ч хэрэг дээрээ энэ тоо үлэмж их, бас аймшигтай үр дагавар дагуулдаг гэж үздэг. Олон улсын эрүүл мэндийн байгууллага Хятадын 15-44 насны мянган эмэгтэй тутмын 24 нь аборт хийлгэдэг гэсэн тоо гаргажээ. 2003 онд дэлхий даяар нийтдээ 42 сая аборт хийсний 9 сая нь Хятадад хийжээ.

Бүсгүйн амьдардаг Шямень хот нь Хятадын орчин үеийн хөгжиж буй хотын тоонд багтдаг. Нөхрийнх нь хэлснээр бол Сяог зодсоноос хойш 40 цагийн дараа үр нь зулбаж, амьгүй хүүхэд гарсан аж.

Энэ мэдээлэл гадаадын олон хэвлэлээр цацагдаж эхэлмэгц, Хятадын талаас "Үнэхээр нэгэн бүсгүй амаржих хугацаанаасаа сарын өмнө эмнэлэгт хэвтсэн нь үнэн. Гэхдээ энэ аборт бол түүний өөрийнх нь хүсэл, шийдвэр байсан” гэж мэдэгджээ.

Харин нөхөр нь "Би нэг ч бичиг баримт хараагүй. Эхнэр бид хоёр ямар ч бичигт гарын үсэг зураагүй. Түүнийг эмнэлэг рүү аваад явахад би цагдаа дуудсан. Гэтэл нөхцөл байдал тэдний мэдлээс давсан хэрэг гэж хэлсэн. Би нэхэмжлэл гаргаж, эрүүгийн хэрэг үүсгэхийг хүссэн ч өмгөөлөгч нар төрийн ажилтнуудтай ам мурийхыг хүсэхгүй байна. Хятадын хэвлэлүүд рүү залгасан ч нийтэлж өгөхөөс татгалзсан" гэжээ.

Ингээд зулбасан үрийн эцгийн ярилцлага "Al Jazeera"-гаар цацагдахад хүрчээ. Харин Сяо бүсгүй одоо хүртэл эмнэлэгт байгаа гэнэ. Зулбасны дараа бие нь эвгүйцэж, хүндрэл үүссэн аж. "Бидэнд ямар хүйсний хүүхэд байсныг нь ч хэлээгүй шүү дээ" гэж Сяогийн нөхөр Лю гашуудан ярьсан байна.

Энэ бол Хятадын удирдлагын гэр бүлийн тухай хуулийг сахиулахын тулд хэрэглэдэг аргын нэг. Хэдийгээр хүний эрхийг ноцтойгоор зөрчиж байгаа ч гэсэн иймэрхүү хэргийг төр засаг болон цагдаагийн газар нь нүдээ даран өнгөрөөж, хэвлэлүүд нь бүрэн цензурт байдаг тул нийтлэхээс татгалздаг гэж "Al Jazeera"-гийн сурвалжлагч мэдээлжээ.